నెల్లూరులో ప్రేమోన్మాది దాడి ... ప్రేమించలేదని బాలిక ఇల్లు తగలబెట్టాడు

నెల్లూరులో ఓ ప్రేమోన్మాది రెచ్చిపోయాడు. తన ప్రేమను అంగీకరించలేదని ఏకంగా అమ్మాయి కుటుంబాన్నే టార్గెట్ చేశాడు. ప్రేమించిన బాలిక ఇంటికి వెళ్లి పెట్రోల్ పోసి నిప్పు పెట్టాడు. నెల్లూరు చిన్నబజారు పోలీసు స్టేషన్ పరిధిలోని రమేష్ రెడ్డి నగర్లో ఈ ఘటన చోటు చేసుకుంది. వంశీ కృష్ణ అనే యువకుడు పదో తరగతి చదువుతున్న ఓ మైనర్ బాలికను ప్రేమించాడు. అదే విషయాన్ని ఆమెతో చెప్పగా.. తిరస్కరించింది. దీంతో కోపంతో ఊగిపోయిన వంశీ.. బాలిక ఇంటికి నిప్పు పెట్టి వారిని అంతమొందించాలని కుట్ర పన్నాడు. ఓ రోజు రాత్రి సమయంలో ఇంట్లోకి వెళ్లి పెట్రోల్ చల్లి నిప్పు పెట్టి పారిపోయాడు. దీంతో ఇంట్లో ఉన్న వస్తువులన్నీ కాలి బూడిదయ్యాయి. అదృష్టవశాత్తు ఎలాంటి ప్రాణ నష్టం జరగలేదు.

తొలుత ఈ ఘటనను షార్ట్ సర్క్యూట్‌గా భావించిన బాధిత కుటుంబం.. సీసీటీవీ ఫుటేజీని పరిశీలించగా నిజం తెలిసింది. బాధితుల ఫిర్యాదుతో కేసు నమోదు చేసుకున్న పోలీసులు.. నిందితుడిని అరెస్టు చేసి కటకటాల్లోకి నెట్టారు.