పెళ్లికి ఒప్పుకోని పెద్దలు... పురుగులమందు తాగిన ప్రేమజంట

పురుగులు మందు తాగి ప్రేమజంట ఆత్మహత్య

పెద్దలు పెళ్లికి ఒప్పుకోలేదని మనస్తాపంతో ఓ ప్రేమజంట ఆత్మహత్యకు పాల్పడింది. పశ్చిమగోదావరి జిల్లాలో ఈ ఘటన చోటు చేసుకుంది. బుట్టాయిగూడెం మండలం నూతిరామన్నపాలెం గ్రామానికి చెందిన నాగంపల్లి శేఖర్.. అదే గ్రామానికి చెందిన యువతితో పరిచయం ఏర్పడింది. ఆ పరిచయం కాస్తా ప్రేమగా మారడంతో ... ఇద్దరు ఒకరినొకరు ఇష్టపడ్డారు. పెళ్లి చేసుకోవాలన్నారు. ఈ విషయం కాస్త ఇరుకుటుంబాల పెద్దలకు తెలిసింది. దీంతో వారిద్దరి పెళ్లికి ససేమిరా అన్నారు. పెళ్లికి ఒప్పుకొనేది లేదని తేల్చిచెప్పారు. దీంతో తీవ్ర మనస్తాపానికి గురైన ఆ ప్రేమికులు కలిసి బతకలేక ...కలిసి చావాలనుకున్నారు.

గురవాయిగూడెంలోని ఓ లాడ్జీలో గది తీసుకున్నారు. ఇద్దరు అనుకున్న ప్రకారం అక్కడికి చేరుకున్నారు. తమ వెంట తెచ్చుకున్న పురుగుల మందు డబ్బా తీశారు. ముందుగా అబ్బాయి శేఖర్ పురుగుల మందు తాగాడు. ఆ తర్వాత అమ్మాయి కూడా ఆ విషాన్ని తాగేసింది. వీరిని గుర్తించిన లాడ్జి యజమాని హుటాహుటిన ఆసుపత్రికి తరలించారు. అప్పటికే శేఖర్ చనిపోగా, యువతి చికిత్స పొందుతూ తుదిశ్వాస విడిచింది. మరోవైపు ఈ ఘటనపై కేసు నమోదుచేసిన పోలీసులు దర్యాప్తు చేస్తున్నారు. ప్రేమజంట ఆత్మహత్యతో ఇరుకుటంబాలతో పాటు.. గ్రామంలో కూడా విషాద ఛాయలు అలుముకున్నాయి.